>
1:57 am - Sunday December 5, 2021

የምስር ዲፕሎማሲ....!!!   (ደምሰው ማሙዬ)

የምስር ዲፕሎማሲ….!!!

  ደምሰው ማሙዬ

ከዛሬ 10 ዓመት በፊት መሠረቱ የተጀመረው የዓባይ ግድብ እንሆ ሊጠናቀቅ አፋፍ ላይ ይገኛል:: ሆኖም ያለማንም የውጭ ድጋፍ በኢትዮጵያውያን የገንዘብ መዋጮ የሚገነባው ይህ ኤሌክትሪክ ማመንጫ በዓባይ ላይ ለረዥም ጊዜ ያለማንም ጣልቃ ገብነት ብቻዋን ስትምነሸነሽበት ለነበረዉ የቀድሞዋ ምስር ላሁኗ ግብፅ የራስ ምታት ሆኖባታል:: ከራሷ አልፎ ለዘብተኛ አቋም የነበራትን ሱዳንንም በማነሳሳት ከኢትዮጵያ ጎን በጠላትነት አሰልፋታለች::
ግብፅ ግድቡ እንዳይጠናቀቅ ለማድረግ የምትችለውን ሁሉ እያደረገች ነው:: በተለይ ያላሰለሰ ዲፕሎማሲያዊ ግንኙነቷን ከተለያዩ የአፍሪካና ከሌሎች ሀገራት ጋር እያጧጧፈችው ትገኛለች:: በተለይ ከኢትዮጵያ ጎረቤት ሀገራት ጋር ጥብቅ ቁርኝት በመፍጠር የሷን በግድቡ ላይ ያላትን አቋም እንዲጋሩ እያደረገች ነው::
የዚህ እቅድ ተባባሪ የሆነችዉ ኬንያም  ከግብፅ ጋር በመከላከያ ትብብር ላይ የቴክኒክ ስምምነትን ፈርማለች:: የኬንያ መከላከያ ሚኒስቴር የሆኑት ሞኒካ ጁማ እና የግብፁ የሠራተኞች ዋና አዛዥ ሌ/ጄኔራል ሞሃመድ ፋሪድ ሄጋዚ ነበሩ ስምምነቱን የተፈራረሙት::
ሁለቱ ሀገራት በሁለትዮሽ የመከላከያ  ተጠቃሚነት ጉዳዮች ላይ አጋርነታቸውን የበለጠ ለማሳደግ የሚያስችል የመከላከያ ትብብር የቴክኒክ ስምምነት ተፈራርመዋል:: ተመሳሳይ ስምምነቶች ከዚህ በፊት በአባይ ተፋሰስ ውስጥ ወይም በዙሪያዋ ካሉ ሌሎች የምሥራቅ አፍሪካ ሀገራት ጋር ግብፅ የተፈራረመች መሆኑ የሚታወስ ነው:: በተለይ በመጋቢት ወር ግብፅ እና ሱዳን ብሔራዊ ደህንነት እና ወታደራዊ ትብብርን በሚመለከቱ ጉዳዮች ላይ የጋራ ተጠቃሚነትን የሚያረጋግጥ ስምምነት ተፈራርመዋል:: ግብፅ እንዲሁ ከብሩንዲ እና ኡጋንዳ ጋር ሚያዚያ ውስጥ ተመሳሳይ ስምምነቶችን ተፈራርማለች::
ግብፅ የኢትዮጵያን ግድብ ውዝግብ ዓለም አቀፍ ለማድረግ ጥሪ አቅርባለች ይላል አረብ ኒውስ በዘገባዉ:: ክርክሩ ያተኮረው ለበርካታ ዓመታት ድርቅ ቢከሰት ኢትዮጵያ ምን ያህል ውሃ ወደታች እንደምትለቅ እና ወደ ፊት ሦስቱ ሀገሮች  የሚነሱ አለመግባባቶችን እንዴት እንደሚፈቱ በሚለው ላይ ነው:: የግብፅ የውጭ ጉዳይ ሚኒስትር ሳሜህ ሹክሪ “ግብጽ በታላቁ ሕዳሴ ግድብ የውኃ ሙሌት  ዙሪያ ላይ የዓለም አቀፉ ማኅበረሰብ ማለትም የተባበሩት መንግሥታት፣ የአውሮፓ ኅብረት፣ አሜሪካና የአፍሪካ ኅብረትን ያካተተ ድርድር እንዲደረግ ትፈልጋለች” ብለዋል:: ሹክሪ እንዳሉት ግብፅ ቀደም ባሉት አጋጣሚዎች “በሕጋዊ መንገድ አስገዳጅ የሆነ ስምምነት ላይ ለመድረስ የድርድር ዘዴን ማዘጋጀት ትፈልጋለች” ብለዋል::
ካርቱም በበኩሏ በሚቀጥለው የዝናብ ወቅት ሁለተኛውን ሙሌት ለመጀመር ያቀደችውን ኢትዮጵያን  ተቃውማለች:: ጠቅላይ ሚኒስትር አብደላ ሃምዶክ በዚህ ወር መጀመሪያ ላይ እንዳሉት ግድቡ ቢያንስ 20 ሚሊዮን ሱዳናዊያንን በግምት የሀገሪቱን ግማሽ ህዝብ ማለት ነው ስጋት ላይ ይጥላል ይላሉ:: ከ100 ሚሊዮን በላይ ህዝብ ያላት ግብፅ ግድቡን የህልውና ስጋት በማለት የአባይ ውኃ ድርሻዋን ይቀንስብኛል ብላ ትጨነቃለች:: ነገር ግን ሁሉን ለኔ ብቻ፣ ቅድሚያ ለኔ ብቻ የሚለው ፈሊጧ ከኢትዮጵያ ጋር ሊያስማማት አልቻለም::
ሦስቱን ሀገራት ለማስማማት ለበርካታ ጊዜ ድርድሮችና ውይይቶች በተለያዩ ሀገራትና ዓለም አቀፍ ተቋማት የተከናወኑ ቢሆንም ዉጤት አልባ ነበር:: ከዋሽንግተን፣ ብራሰልስ ወይም ከተባበሩት መንግሥታት የተሰጠ አፋጣኝ አስተያየትም የለም::
ግብፅ እና ሱዳን በግድቡ ሙሌት እና ሥራ ላይም እንዲሁ ሕጋዊ አስገዳጅ ስምምነት እንዲደረግ ጥሪ ያቀረቡ ሲሆን ኢትዮጵያ ግን መመሪያዎችን አጥብቃ ትከራከራለች:: በአፍሪካ ሕብረት የሚመራው ድርድር መሻሻልን ማሳየት ባለመቻሉ በሦስቱ ሀገራት መካከል ውጥረቶች ተባብሰዋል:: አድሏዊነት በተሞላበት ሁኔታ በአሜሪካ መሪነት ሀገራቱን ለማስማማት የተደረገውን ሙከራ ኢትዮጵያ ሳትቀበለው ቀርታለች:: የቀድሞዉ ፕሬዝዳንት የዶናልድ ትራምፕ አስተዳደር ባለፈው ዓመት ከግብፅ እና ከሱዳን ጋር ስምምነት ከመድረሱ በፊት በግድቡ የመጀመሪያ ሙሌት ላይ ኢትዮጵያን ለመጫን ሲፈልጉ እንደነበር አይዘነጋም::
ወደ 85 ከመቶዉ የናይል ፍሰት የሚመነጨው ከኢትዮጵያ ነው:: ኢትዮጵያ ግድቡ አሁን ከሦስት አራተኛ በላይ መጠናቀቁን በመግለፅ በ2023 በሚሊዮን የሚቆጠሩ ዜጎችን ከድህነት ለማውጣት የሚያስችል ሙሉ ኃይል የማመንጨት አቅም ላይ እንደሚደርስ ተስፋ አድርጋለች::
በአባይ ግድብ ችግር የፀጥታዉ ም/ቤትን ድጋፍ ለማግኘት ግብፅ ኬንያን እየተመለከተች ነው ይላል አል ሞኒተር ድረገጽ ባወጣዉ ዘገባዉ:: በታላቁ የኢትዮጵያ ህዳሴ ግድብ ሙሌት ላይ በተፈጠረው አለመግባባት ግብፅ እና ሱዳን በተባበሩት መንግሥታት የፀጥታዉ ም/ቤት የአፍሪካ ተወካይ የሆነችውን የኬንያ ድጋፍ ለማግኘት እየሞከሩ ነው:: በተለይ ግብፅ ከመመልከት ባለፈ ብዙ ርቀት ተጉዛለች::
ኬንያ በተባበሩት መንግሥታት የፀጥታዉ ም/ቤት የአፍሪካ ተወካይ በመሆኗ ግብፅ በታላቁ የኢትዮጵያ ህዳሴ ግድብ ላይ ለነበራት አቋም የኬንያን ድጋፍ ለማግኘት ትፈልጋለች:: ግብፅ የግድቡን ጉዳይ በመደበኛነት ወደ የተባበሩት መንግሥታት የማቅረብ አማራጭም እያሰላሰች ነው::
ለዚህም የግብፅ የውጭ ጉዳይ ሚኒስትር ሳሜህ ሹክሪ ኬይር በግድቡ ላይ ስላለው አቋም የአፍሪካን ድጋፍ ለማሰባሰብ ባቀዱት  ጉብኝታቸው ኬንያን የመጀመሪያ መዳረሻቸው አድርገዋል:: በመሆኑም ሚያዚያ 19 በ2021 ሹኩሪ ከኬንያዉ ፕሬዝዳንት ኡሁሩ ኬንያታ ጋር ተገናኝተዋል:: የግብፅ የውጭ ጉዳይ ሚኒስቴር መግለጫ እንዳስታወቀው ሹኩሪ  በግድቡ ላይ ስምምነት ከተደረሰ “የቀጣናውን ፀጥታና መረጋጋት የሚያስጠብቅ ነው” ብለዋል::
መግለጫዉ በተጨማሪ  ኬንያ ቅድሚያ በምትሰጣቸው ጉዳዮች  እና ኬንያ ውስጥ የልማት ፕሮጀክቶችን ለመደገፍ ግብፅ ዝግጁ መሆኗን አመላክተዋል:: ሹኩሪ ናይሮቢን ከመጎብኘታቸው ከአንድ ሳምንት በፊት የግብፅ የውጭ ጉዳይ ሚኒስትር ስለ የተባበሩት መንግሥታት ዋና ጸሃፊ አንቶኒዮ ጉቴሬዝ እና የተባበሩት መንግሥታት የፀጥታዉ ም/ቤት የግድቡን ጉዳይ እና የተለያዩ የድርድር ደረጃዎችን የሚያብራሩ ደብዳቤዎችን መላካቸውን ልብ ይሏል::
ሱዳን ከኬንያ ጋርም በግድቡ ዙሪያ የበለጠ መነጋገር እንደምትፈልግ ገልጻ ነበር:: በየካቲት ወር 2019 ኬንያታ ከሱዳን የሉዓላዊነት ምክር ቤት ኃላፊ ከአብዱልፈታህ አል-ቡርሃን የሱዳንን አቋም በዓባይ ግድብ ዙሪያ የሚያስረዳ ደብዳቤ ደርሷቸው ነበር::
ግብፅ በኬንያ በኢኮኖሚ እና በንግድ ውስጥ ተጽዕኖ ያላት ሲሆን በሁለቱ ሀገራት መካከልም የጋራ ወታደራዊ ትብብር ተፈጥሯል:: ኬንያ ከትላልቅ የአፍሪካ ሀገራት አንዷ ስትሆን ከቅርብ ዓመታት ወዲህ በኬንያ እና በግብፅ መካከል ወደ ውጭ የሚላከው ምርትም እየጨመረ ነው::
ኢትዮጵያ ላይ ጫና ለመፍጠር የማትፈነቅለው ድንጋይ የሌላት ግብፅ ጎረቤት ሀገራትንና በዓለም አቀፍ ደረጃ ተሰሚነት አላቸው ብላ የምታስባቸውን ሀገራት ከጎኗ ለማሰለፍ ከወታደራዊ እስከ ገንዘብ ድጋፍ ማድረጓን ከቀጠለች ሰነባብታለች:: ለአብነት ያህል እ.ኤ.አ. በጥር 2017 የግብፅ የመስኖ ሚኒስትር ሞሃመድ አብደል አቲ ባፀደቁት የትብብር ስምምነት ማዕቀፍ ውስጥ ለኬንያ አምስት ነጥብ አምስት ሚሊዮን ዶላር ለግሳለች:: ስምምነቱ 20 የውሃ ጉድጓዶችን መቆፈር፣ ስድስት ግድቦችን መገንባት እና ፕሮጀክቶቹን ለማከናወን የኬንያ ሠራተኞችን ማሰልጠንን ያካተተ ነበር:: ገንዘቡ የኬንያ የውኃ ሃብት አያያዝ እና የልማት ዕቅድን ለመተግበር ነበር በግብፅ ድጋፍ የተደረገው::
እ.ኤ.አ. የካቲት 2017 የግብፅ ፕሬዝዳንት አብዱልፈታህ አልሲሲ ናይሮቢን የጎበኙ ሲሆን እ.ኤ.አ. መጋቢት 2020 ደግሞ ከሲሲ ጋር በተደረገ የስልክ ጥሪ ኬንያታ በግድቡ ድርድር ላይ የግብፅን አቋም ሀገራቸው እንደምትደግፍ የግብፅ ፕሬዝዳንት መግለጫ አስታውቋል::
እ.ኤ.አ. በጥቅምት 2020 ኬንያታ ደግሞ በተራቸው ካይሮን ጎብኝተዋል:: በጉብኝታቸው ወቅት ሲሲ ከኬንያው አቻቸው ጋር በነበራቸው ቆይታ “ግብፅ ኬንያ የአፍሪካን አህጉር በፀጥታዉ ም/ቤት ሙሉ በሙሉ የመወከል ችሎታዋን ታምናለች” ብለዋል::
የግብፅ እና የኬንያ የመከላከያ ሚኒስትሮች በሁለቱ ሀገራት መካከል የወታደራዊ መሳሪያዎች አቅርቦትን ለመተባበር ስምምነት ላይ የደረሱ በመሆኑ የግብፅ እና የኬንያ ትብብር እስከ ወታደራዊ ደረጃ ዘልቋል::
በካይሮ የአል-አህራም የፖለቲካ እና ስትራቴጂክ ጥናት ማዕከል የናይል ተፋሰስ ጥናት ክፍል ኃላፊ የሆኑት ሀኒ ራስላን “ግብፅ የኬንያን ድጋፍ ወይም ቢያንስ ኬንያ ወደ ግድቡ ጉዳይ ሲመጣ ገለልተኛ ሚና እንድትጫወት ትፈልጋለች” ብለዋል:: ይህ በተለይ ኬንያ በፀጥታዉ ም/ቤት አባል ሀገርነት የተነሳ ነው:: ተስፋው ኬንያ ግብፅን ወደ ፀጥታዉ ም/ቤት ጉዳዩን ይዛ ብትሄድ  እንቅፋት አይሆንም በሚል ነው::
ራስላን ለአል ሞኒተር እንደተናገሩት ሮይተርስ እ.ኤ.አ. በሐምሌ 2020 በኬንያ የሚገኙ ዓሳ አጥማጆች የቱርካና ሐይቅ ገባር በሆነው በኦሞ ወንዝ ላይ ኢትዮጵያ በገነባችዉ ግዙፍ ግድብ ሳቢያ ዓሳ እየቀነሰ በመሆኑ ነዋሪዎቹ እያማረሩ ነው ብሎ ዘግቦ ነበር:: ራስላን ከዚህ ዘገባ በመነሳት “የታላቁ የኢትዮጵያ ህዳሴ ግድብ እንዲሁ በኬንያ ላይ አሉታዊ መዘዞችን ያስከትላል የሚል እምነት አለኝ” ብለዋል:: ስለሆነም ኬንያ ከታላቁ የኢትዮጵያ ህዳሴ ግድብ ሊደርስ ስለሚችል ጉዳቶች የግብፅን ቅሬታ ትረዳለች የሚል ተስፋን ሰንቀዋል::
በአባይ ውዝግብ መካከል ትብብርን ለመፍጠር የግብፅ ፕሬዝዳንት  አብዱል ፈታህ አል-ሲሲ ከኢትዮጵያ ጋር እየተካሄደ ባለው የውኃ ውዝግብ ዙሪያ ተጨማሪ የግብፅ ዲፕሎማሲያዊ ሙከራ አካል ለማግኘት  ከጂቡቲ አቻቸው ጋር ለመወያየት በጅቡቲ ተገኝተዋል::
አሶሼትድ ፕሬስ  እንደዘገበዉ የአብዱል ፈታህ አል ሲሲ የአፍሪካ ቀንድ ሀገር በሆነችው   ጅቡቲ ያደረጉት ጉብኝት እ.ኤ.አ. በ1977 ጅቡቲ ነፃነቷን ካወጀች በኋላ በግብፅ ፕሬዝዳንት ስትጎበኝ ለመጀመሪያ ጊዜ አድርጎታል::
አል-ሲሲ እና የጅቡቲው ፕሬዝዳንት እስማኤል ኦማር ጉሌህ የኢትዮጵያን ግድብ፣ አካባቢያዊ መረጋጋትን ለማስቀጠልና እና የሁሉንም ወገኖች ጥቅም ለማስጠበቅ በሚያስችል “ፍትሃዊ እና አስገዳጅ በሆነ ሕጋዊ ስምምነት” መሞላት እና መከናወን እንዳለበት ተስማምተዋል:: .
የግብፅ ፕሬዝዳንት ቃል አቀባይን ጠቅሶ  የአል አይን ሚዲያ እንደዘገበዉ የሲሲ የጅቡቲ ጉብኝት ታሪካዊ እና በዓይነቱ የመጀመሪያ ነው::  ቀስ በቀስ ስትራቴጂካዊ ግንኙነቶ እየገነባች ምትገኘው ግብፅ  በጂቡቲ ያደረገችው ጉብኝት የሁለትዮሽ ግንኙነቶች በተለይም በፀጥታ፣ በወታደራዊ እና በኢኮኖሚያዊ ጉዳዮች መካከል ግንኙነቶችን ማጠናከር በሚቻልባቸው መንገዶች ላይ ያተኮረ ነበር::
ግብፅ ከወሬ ባለፈ ወደ ተግባር በመግባት የሀገራቱን ድጋፍ ለማድረግ እርዳታዎችን እየለገሰች ትገኛለች:: እ.ኤ.አ ግንቦት 26 2021 የግብፅ ሁለት ወታደራዊ የዕርዳታ አውሮፕላኖች ከፍተኛ ቁጥር ያላቸውን መድኃኒቶች፣ የሕክምና አቅርቦቶችና ምግቦችን ይዘው ወደ ጅቡቲ አቅንተዋል:: የጅቡቲ ባለሥልጣናት ግብፅ ላደረገችው ጥረት አድናቆታቸውን መግለጻቸውን ኢጅፕት ቱዴይ ዘግቧል:: በተመሳሳይ የግብፅ የጤና ሚኒስትር በኮሮና ቫይረስ ክፉኛ ለተጎዳችው ህንድ ከፍተኛ የመድሀኒት እርዳታ አበርክታለች:: ይህ እርዳታ ግብፅ ከሁለት ሳምንት ባነሰ ጊዜ ውስጥ ወደ ህንድ የላከችው ሁለተኛው የእርዳታ ነው::
ኢትዮጵያ ግዙፍ የሆነውን የህዳሴ ግድቧን የመሙላት ሁለተኛ ምዕራፍ በጀመረችበት በዚህ  ወር  ግብፅ ከፍተኛ ጭንቀት ውስጥ ገብታለች:: ከዚህ ጭንቀቷ ለመገላገልም  ከሱዳን ፣ ከተባበሩት ዓረብ ኤመሬትስ ፣ ከግሪክ እና ከሌሎች ሀገራት ጋር የጠበቀ ወታደራዊ ግንኙነት ለመፍጠር አበክራ እየሠራች ነው::
ከሁሉም በላይ ደግሞ ግብፅ የሃማስ-እስራኤል የተኩስ አቁም ስምምነትን ለማስፈን ረድታለች:: ግጭትን ለመቀነስ የሚሞክር አስፈላጊ ተጫዋች ሆናለች :: ኢራን እና ቱርክ የሃማስን የጦርነት ጥረት የሚያበረታቱ እና አክራሪነትን የሚያነሳሱ ቢሆኑም ግብፅ ግን በተቃራኒው በመሰለፍ በድርድር እንዲቆም አድርጋለች:: በዚህ ሚናዋም ከዋሽንግተን የበለጠ ተዓማኒነት አግኝታለች::
እንደሚታወቀው ጅቡቲ ለመርከቦች አስፈላጊ ጣቢያ እና ለምዕራባዊያን ወታደሮች እና ለሌሎችም ስትራቴጂካዊ መሠረት ናት:: ይህም ለአፍሪካ ቀንድ ደኀንነት አስፈላጊ ነው::አስፈላጊነቱም በኢትዮጵያ፣ በኤርትራ፣ በሶማሊያ እና በየመን ተጽዕኖ ሊያሳድር ስለሚችል ነው:: ግብፅ ከረጅም ጊዜ በፊት በ1960ዎቹ ውስጥ በየመን ውስጥ የበለጠ ጠንካራ ሚና ተጫውታለች:: አል-አይን “ሁለቱ አረብ ሀገራት በግብፅ እና በጅቡቲ መካከል የትብብር ማዕቀፎችን ለማሳደግ ጠንካራ ፍላጎትን የሚያመለክቱ የጋራ ፍላጎቶችን ለማሳካት ይፈልጋሉ” ይላል::
አል ሲሲ ከጊሌ ጋር ያደረጉትን ውይይትም “ገንቢና ፍሬያማ” ሲሉ ያወደሱ ሲሆን ሁለቱም መሪዎች የፖለቲካ፣ ኢኮኖሚያዊ እና ወታደራዊ ትብብርን ማሻሻል በሚቻልባቸው ጉዳዮች ላይ መወያየታቸውን አብራርተዋል::
ሁለቱም መሪዎች በአፍሪካ ቀንድ ሽብርተኝነትን ለመዋጋት ያላቸውን “ስትራቴጂካዊ አጋርነት” አፅንዖት የሰጡ ሲሆን በቀይ ባህር እና በባብ ኤል-ማንደብ ወንዝ የፀጥታ ጉዳዮች ላይ ያላቸውን ትብብር አፅንዖት መስጠታቸውን የግብፅ ፕሬዝዳንት ጽህፈት ቤት አስታውቋል::
በግብፅ የአል-አህራም የፖለቲካ እና ስትራቴጂካዊ ጥናት ማዕከል የአፍሪካ ባለሙያ የሆኑት አማኒ ኤል-ታዌል “ጅቡቲ ከኢትዮጵያን ጎን እንዳትወግን ለመከላከል” በግብፅ እና በጅቡቲ መካከል መቀራረብ ወሳኝ ነው ብለዋል::
“ከቅርብ ጊዜ ወዲህ ግብፅ ከሁሉም የናይል ተፋሰስ ሀገራት እና ቀይ ባህርን ከሚመለከቱ ሀገሮች ጋር ጥሩ ግንኙነት ለመፍጠር እየፈለገች ነው” ያሉት ሚኒስትሯ “እንደነዚህ ያሉት ሁለት ክልሎች የአባይ ወንዝን እና ስዊዝን ጨምሮ ከግብፅ ሁለት አስፈላጊ ብሄራዊ ደኀንነት ጉዳዮች ጋር የተያያዙ ናቸው::
የአባይ ሙግት ድርድር በሚያዚያ ወር የቆመ ሲሆን ከዚያ ወዲህ ዓለም አቀፍ እና አህጉራዊ ጥረቶች ያለ ውጤት ድርድሩን ለማደስ ሞክረዋል::
በመጋቢት ወር አል-ሲሲ የግብፅ የአባይ ድርሻ የማይዳሰስ መሆኑን በማስጠንቀቅ “ኢትዮጵያ ያለ ዓለም አቀፍ ስምምነት ግድቡን  ከሞላች ማንም ሊገምተው የማይችል አለመረጋጋት” እንደሚኖር አስጠንቅቀዋል::
ግብፅ እና ሱዳን በ 2021 ኢትዮጵ በግድቡ ማጠራቀሚያ ላይ 13 ነጥብ አምስት ቢሊዮን ኪዩቢክ ሜትር ውሃ ለመጨመር ያቀደችው እቅድ ለእነሱ ስጋት ነው ሲሉ ይከራከራሉ:: ድንበር ተሻጋሪ ወንዞችን በሚቆጣጠሩ ዓለም አቀፍ ሕጎች ላይ በመመርኮዝ ግብፅ ግድቡ እንዴት እንደሚሠራ እና እንደሚሞላ የሚገልፅ ሕጋዊ አስገዳጅ ስምምነት ስትፈልግ ቆይታለች::
ፕሬዝዳንት ጆ ባይደን  ግብፅ የአባይ ውኃ አቅርቦት ችግር እንዳላት አምነው “የዲፕሎማሲያዊ ውሳኔ” ላይ ለመድረስ የአስተዳደር ፍላጎታቸው እንደሆነ ተናግረዋል::
ግብፅ ከ90 በመቶ በላይ የውሃ አቅርቦቷን በአባይ ወንዝ የተመሠረተ ነው:: ሆኖም ከ80 በመቶ በላይ የአባይ ዉኃ አቅራቢ የሆነቸው ኢትዮጵያ ተጠቃሚ እንዳትሆን አበክራ እየሠራች ትገኛለች::
Filed in: Amharic