★ ቀደም ብለን ብቻችንን የጀመርነው የተለመደው የጸሎት መርሀ ግብራችን ከ96,664 ቤተሰብ በላይ ባፈራው Http.t.me/ZemedkunBekeleZ የቴሌግራም ቻናላችን ላይ ዛሬም እንደ ትናንቱ ይቀጥላል። ቅድሚያ ይሄ ይነበብ።

 ሳያነብ ኮመንት የሚሰጠውን ስለምቀስፈው ብዙም አትጨነቁ። በነገራችን ላይ በፌስቡክ ስሙ #Samuel_Tibebu የሚለው የግሪታዴ ታሪኩ አበራ ሌላኛው አካውንቱ ነው። እንድታውቁት ብዬ ነው። ለእኔ የመልስ ምት ብሎ መድከም የሚጀምረው በዚያኛው አካውንቱ ነው። እኔን፣ ምህረተአብን፣ ማኅበረ ቅዱሳንና ዳንኤል ክብረትን መስደብ ሲፈልግ በዚያ ነው የሚጠቀመው። ዛሬ መጻፍ ይጀምራልና በዘከያ ተከታተሉት።

•••

እናንት ገዳፈኞች ሳልወድ ጎትጉታችሁ፣ ጎትጉታችሁ የማልፈልገውን ታሪክ አስጀምራችሁ መቋጫ አጥቼ ተቸገርኩ አይደል? ነገርን ነገር እያነሳው እኮ እንደ ክር ተመዝዞ ተመዝዞ አላልቅ አለኝ። የፈጀውን ይፍጅ እንጂ ትረካዬንማ አላቆማትም።

★ እናንተም የትም አባታችሁ መሄጃ የላችሁም እየተገላበጣችሁ ተጋቷት። ነገ የታሪኩ ይቋጭና የእህተ ማርያም ይቀጥላል።

•••

የእኔ ምስክሮች ከመሰማታቸው በፊት ኤልያስ የሚባል ጋዜጠኛ በሆነ አሁን በማላስታውሰው ሰው በኩል አገኘኝ። አገኘኝና አወራኝ። ምን ልርዳህም አለኝ። ምንም አልኩት። ተው ሰዎቹ ያሳስሩሃል አለኝ። እንደፈለጉ አልኩት። ኬሬዳሽ። የሆነ ቀን ኤልያስና ከጋዜጠኛ ብርቱካን ሀረገወይን ጋር  አገናኘኝ። ብርቱካን ካዛንችስ የሚገኘው ቤቷ ቀጠረችኝ፣ ሄድኩ ረጅም ሰዓት አወራችኝ። ቆይታም በሌላ ቀን ደውላ ዛሬ እፈልግህሃለሁ በዚህ ሰዓት ና ብላ ቀጠረችኝ። የጋዜጠኛ ብርቱካን ባለቤት በሩሲያ የኢትዮጵያ አምባሳደርና የፕሬዘዳንት ግርማ ወልደ ጊዮርጊስም ፕሮቶኮል ሆነው ማገልገላቸው ይታወቃል። ከእሳቸው ጋር ልታገናኘኝ ይሆን እንዴ እያልኩ በውስጤ ሳብሰለስል “ዛሬ አንድ ትልቅ የኢህአዴግ ሰው ሊያወራህ ይፈልጋል እናም ስልክህን አጠፋፋና እንሄዳለን ትለኛለች። ማነው? የት ነው? ለሚለው ጥያቄ ምላሽ የለም። ውኃ የመሰለ ቪ8 መኪና መጣ፣ ሹፌሩ እኔና ብርቱካን ገብተን ጉዞ ጀመርን።

•••

ከርቸሌ ሚካኤል አካባቢ እንደደረስን መኪናው ብርሃን ዘኢትዮጵያ ጣይቱ የባህል ማዕከል” የሚባል ግቢ ጋር ደርሶ ቆመ። በሩ ተከፈተና ገባን። ትልቅ ግቢ፣ የጎጆ ቤቶች ያሉት ሰፊ ቤት ነው። የነገሥታቱ ፎቶ እስከ መለስ ዜናዊ ድረስ የተሣሉበት ግቢም ነው። አንዲት ጎልማሳ ሴት ተቀበለችን። እሱ ነው አለቻት ብርቱካንን። አዎ አለች ቡርቱካን። ተከተሉኝ ተባልና ተከትለናት ወደ አንደኛው ጎጆ ቤት ገባን። ቤቷ ውስጥ አንድ በቴሌቭዥን ብቻ የማውቀው የሃገሪቷ አድራጊ ፈጣሪ ሰው በአካል ተቀምጦ አየሁት። ሰላም ብለነው ጠቀመጥን። እሱ ነው? አላት በጥያቄ መልክ ብርቱካንን? አዎ አለችው። እንቀጥላ ውይይታችንን አሉ ሰውዬው። ይቻላል አልኩኝ እኔ የውይይቱን ርዕስ ባላውቀውም በውይይቱ መሳተፍ አያቅተኝም ብዬ ማለት ነው። ያው እኔን ታውቀኛለህ ብዬ እገምታለሁ አሉ ባለሥልጣኑ። በሚገባ እንጂ። በሚገባ አውቆታለሁ። እርስዎን የማያውቅ ሰው አለ እንዴ አልኳቸው። ደህና እንቀጥል አሉ አቦይ ስብሀት ነጋ።

••••

መጀመሪያ ስሜ ተተነተነ፣ የአባቴም የአያቴም ተቆጠረ። ከዚያ የእናቴ አባት እስከ አያት። እናቷም አልቀሩ። ሐረር ለምን እንደተወለድኩም ተጠየቅኩ። አዲስአበባ መቼና ለምን እንደመጣሁ፣ እስከስንተኛ ክፍል እንደተማርኩ፣ በቤተ ክርስቲያን የአገልግሎት ድርሻዬን፣ ሥራዬ፣ ኑሮዬ። የሚስቴ ዘር ሁሉ ተጠየቀ። ሁሉንም መለስኩ። የመጀመሪያው ቀን ምርመራ በዚህ አበቃና ለሁለተኛ ቀን ቀጠሮ ይዘን ተለያየን። የአቦይ ሹፌር በቪ8 መኪናው ሌሊት 7ሰዓት እኔን ቤቴ አድርሶኝ እንዲመጣ ታዘዘ። እንደታዘውም አደረገ።

•••

በሁለተኛውም ቀን በሰዓቴ ካዛንችስ እሄዳለሁ። ሃናን ዳቦ ቤት ጋር እጠብቀዋለሁ። ያ ቪ8 መጥቶ መጀመሪያ እኔን ከዚያ ብርቱካንን ይዞን እብስ ብሎ ይሄዳል። ዛሬም አቦይ ብቻቸውን እዚያው ጎጆ ቤት ውስጥ ናቸው። ለአቦይ የሆኑ የአረቄ መዓት ተደባልቆ ይሰጣቸዋል። ለብርቱካን ውኃ። እኔ ብሞት ንክች አላደርግም ብዬ ብርድ ይጠጣኛል። አቦይ ስብሃት ዛሬ መረር ብለዋል። ጥያቄያቸው በሙሉ ማኅበረ ቅዱሳን ዙሪያ ነው። እኔ ዝም። ተናገር እንጂ ሃሳብ ስጥ። እኔም ስለማኅበረ ቅዱሳን የማውቀው ነገር የለም አልኩኝ ኮስተር ብዬ። አባል አይደለሁም። በመጽሔት በጋዜጣና በአገልግሎታቸው ካልሆነ ስለማኅበሩ አላውቅም አልኩ። እንዴ? ማኅበረ ቅዱሳን አይደለህማ አሉ አቦይ ስብሃት? አዎ አልኩ? ታዲያ ለምንድነው የምትሟገትላቸው? በየፌስቡኩ፣ በየመጽሔቱ ለምን ትሟገትላቸዋለህ አሉኝ? ምክንያቴን አስረዳሁ። ተቆጡ። ታዲያ ከነበጋሻው ጋር ለምን ትጣላለህ? ምንስ ያገባሃል? አበዱብኝ አቦይ። እኔም ግማሽ ትሁት፣ ደግሞም ደፋር ለመምሰል እየተወዛገብኩ በኋላ ደግሞ እንዳይታዘቡኝ፣ ፈሪ ነው እንዳይሉኝ ብዬ ሄጵ አልኩ። ብርቱካን ኧረ ቀስ በል እስክትለኝ ድረስ ዊኒጥ ዊኒጥ አልኩ። ቡካትያም ነገር ነው እንዳይሉኝ የውስጤን ጭንቀት ደብቄ ከሽማግሌው ጋር የሌለ ገተታ ጀመርኩ። መጠጡን በላይ በላዩ ይጨልጡታል። ስካራቸውን ከእኔ ጋር በመጯጯህ ያሳልፉታል። ለሦስተኛ ቀን ተቀጣጥረን በትላንቱ መንገድ ተለያየን።

•••

ከመለያየታችን በፊት ግን ራሴ ሞልቼ እንድመጣ ቃለመጠይቅ አዘጋጅተው ሰጡኝ። መጠይቁ በሙሉ ማኅበረ ቅዱሳንን በተመለከተ ነው። በራሳቸው እጅ ጽሑፍ የተዘጋጀም ነው። እኔ ታዲያ ምኔ ሞኝ ነው የማኅበረ ቅዱሳኑን መምህር ታደሰ ወርቁን ጠራሁና ጉዳዩን ነግሬ ቃለመጠይቁን እኔን ሆናችሁ ሞልታችሁ በቶሎ ለነገ ስጡኝ እና ለሽማግሌው ልውሰድለት ብዬ ሰጠሁት። እነ ታዴም ተሰብሰበው እኔን ሆነው ስለማኅበራቸው ሞልተው ጽፈው ሰጡኝ። በኮምፒዩተር አዘጋጅቼ ነበር የሰጠሁት። ስንገናኝ አቦይ ስብሃት ተደነቀ። ቀዝቀዝም አለ። ሼባውን ሠራሁለት። ከዓድዋ መጥቶ ሊያጃጅለኝ ያምረዋል እንዴ አልኩኝ በሆዴ። በአፌማ አብጃለሁ እንዴ ሆሆይ !

•••

እንዲህ እንዲህ እያልን 7 ይሁን 8 ቀን ብቻ እዚያው ቤት እየተገናኘን የጉድ መዓት እየሰማሁ አሳለፍን። ሹፌሩ የምትገርም ሰው ነህ አለኝ እየተላመድን ስንመጣ። እዚህ ቤት እኮ አቦይ ጳጳሳቱን ሁሉ አስመጥቶ አምጰርጵሮ ነው የመለሳቸው። አንተ ግን ተሳፈጥከው። የሐረር ልጆች ጠባይ ነው። የንቀት አይደለም ሲል ሰምቼዋለሁ። እናም ትንሽ ብትረጋጋ አለኝ። ሞኜ በውስጤ እንዴት እንደቀዘንኩ አላየህ ብዬ በአፌ ሹፌሩም ላይ በል እባክህ ጥፋ። ሁለት ነፍስ የለ እያልኩ መተርተሬን ቀጠልኩ። እሱም ላይ ሄጵ አልኩበት። ሹፌሩ እየሰለለኝም ከሆነ የራሱ ጉዳይ ብዬ የበሰበሰ ዝናብ አይፈራም በሚለው ቀጥዬበታለሁ። ለሹፌሩም ለተጋሩውም አንንድ አይነት አቋሜን አሳይቼያቸዋለሁ። አንዳንዴ ግን ብቻዬን ስሆን ምን ሆኜ ነው ብዬ ራሴን እወቅሳለሁ። የምን ቅብጠት ነው። ባትሪ እንዳፈላሁ ሁሉ ይሰማኛል። ዛሬ እንኳን ሄጵ አልልም እልና እዚያ ስደርስ አፌ ሌላ ልቤ ሌላ ሆነው ቁጭ። ልቤ ኧረተው ዘመዴ አትቅለብለብ ይለኛል፣ አትሳፈጣቸው ይለኛል። አፌደግሞ ልቤን አልሰማ ብሎ ጲሪሪሪሪም ጳራራራም ብሎ መልሶ ራሴኑ ያሸማቅቀኛል። አልተገናኝቶም።

•••

የመጨረሻው ቀን ማስጠንቀቂያ ነበር። ከእነበጋሻው ፊት ገለል በል። እምቢ ካልክ ለሚደርስብህ ነገር በሙሉ ኃላፊነቱ የራስህ ነው። እናም ውሳኔው ይሄ ነው። ምርጫው የአንተ ነው አሉኝ አቦይ። ዝም ብሎ መውጣቱ ፈሪ ሊያሰኘኝ ሆነ። ብርቱካንም ወሮ ሳቤላም ሊታዘቡኝ ሆነ። ከምር ሁለቱም ሴቶች በአቋሜ ደስተኞች ናቸው። ሆኖም ከራሴ ጋር ስሟገት ቆየሁና የሞት ሞቴን ተነፈስኩ። “ አላቆምም። የሚመጣውን ሁሉ ለመቀበል ዝግጁ ነኝ። የሚል ቃልን የሞት ሞቴን አምጬ የግዴን ተነፈስኩባቸው” አከተመም አልኳቸው። አንዴ ከበሰበስኩ አይቀር ብዬም መተርተሬን ቀጠልኩ “ ህወሓት ከትግራይ መጥታ፣ ከአክሱም ጽዮን ከቅዱሳኑ ሃገር መጥታ እንዲህ ለአፍራሾች ዱላና ድጅኖ አቀባይ በመሆኗ አዝናለሁ አልኳቸው።” ዋይ ሙን አባቱ ይላል ይሄ ጭንጋፍ የማታውቀው ነገር አለ አርፈህ ተቀመጥ አሉኝ። አልቀመጥም ልል ፈለኩና ቅድም ተናግሬው የለ አሁን ምንአስደገመኝ፣ ደፋር ለመምሰሌ እንደሆነ አንዴ ተመዝግቦልኛል ብዬ ፈርቼ ፍርሃቴም እንዳይታወቅብኝ እየተኮፈስኩ ተሰነባብተን ተለያየን።

•••

ቀጣዩ የፍርድ ቤት ቀን ደረሰ። የእኔ ምስክሮች ቀረቡ። መምህር ደጉና ሌሎቹም የመከላከያ ምስክሮቼ ቀርበው መሰከሩልኝ።

ዳኛው ሙሉ የኔታን ደጉን ይጠይቃቸዋል። ዘመድኩንን

ያውቁታል?

አዎን አውቀዋለሁ።

በጋሻውንስ?

እሱንም አውቀዋለሁ።

የትነው የሚያውቋቸው?

ተማሪዎቼ ናቸው። ዘመድኩን ጨርሷል። በጋሻው ለክረምት እረፍት እንደወጣ አልተመለሰም። በዚያው ቀርቷል። ኋላ ላይ መጋቤ ሀዲስ መባሉን ሰምቻለሁ።

ዐቃቤ ሕግ ጠየቀ?  መጋቤ ሀዲስ ተብሎ መጠራት አይችልም እንዴ?

የኔታም መለሱ። ሳላስተምረው? ሳይማር መጋቤ ሀዲስነት ከየት ይመጣል?

እና ማን ሰጠው?

እንጃ የሰጠውን ነዋ መጠየቅ።

ዳኛው ቀጠለ ዛሬ የመጡበት ጉዳይ ብሎ ብዙ ከዘበዘበ በኋላ በመጨረሻም ዘመድኩን ቤተ ክርስቲያኒቱን ወክሎ ለተሃድሶ ለመናፍቅ እያለ መልስ መስጠት ይችላል እንዴ አላቸው?

እንግዲያስ። ይችላል እንጂ። አስተምረን ያስመረቅነው ኋላ ምን ሊያደርግ ኖሯል። መልስ ሊሰጥ። አንደበት ሊሆናት መስሎኝ። እና እኔስ ምን አደከመኝና አስተማሪ እሆናለሁ። ይችላል አሉት። ቀሪዎቹም እንዲሁ መስክረው። ፍርድቤቱ ጉባኤቤት መስሎ ቃለህይወት ያሰማልን ተባብለን ተለያየን። የመጨረሻ የፍርድ ቀን ደረሰ።

•••

አንድ ቀን አንድ አልባሌ የሚለብሱ እግራቸው ላይ የሚያማቸው፣ ጊዮርጊስ የሚተኙ፣ ጎንደርም አሁን ደግሞ እንጦጦ ማርያም የሚኖሩ አባት ከሱቅ መጡና ባለቤቴን ከቤታችሁ የዛሬን አሳድሩን ይላሉ። ሰውየው የተጠቀሙ መሆናቸውን አውቃለሁና ይምጡ እንሂድ ብዬ ይዣቸው ሄድኩ። ሰክረዋል አይገልጻቸውም። ሆን ብለው እንደሆነ እኔ አውቃለሁ። የብዙ ባህታውያን ጠባይም ነው። እቤት እንደደረሰን የት እናንጥፍላቸው ብለን ስንጨነቅ አንድ ሲሚንቶ ማጠራቀሚያ የነበረ ቆርቆሮ ቤት እያሳዩን እዚህ ነው የማድረው አሉ። ምንጣፍ አልፈልግም አሉ። እሺ ይሁን ብለን ተሰናብተናቸው ልንሄድ ስል ጠሩንና እርስዎ አሉኝ እኔን እኮ ነው። እርስዎ ለ3 ወር የሉም አይደለ እኔ እዚህ ሆኜ ቤቱን እጠብቃለሁ አሉን። በስካር አንደበት ነው ብለን ይሁን ብለናቸው ተለይተናቸው ወደ ክፍላችን ሄድን።

•••

በማግስቱ የፍርዱ ቀን ዳኛው ከመሬት ተነስቶ እምቧከረዩ አለ። ፎገራ። ሁሉም ሰው ደነገጠ። እኔ ዝም አልኩኝ። ቆሰቆሰኝ። ዝም ጭጭ አልኩኝ። ከጠበቃዬ ጋር ተጯጯሁ። ፍርድ ቤቱ የሆነ የፑልቤት ጸብ መሰለ። በመጨረሻም ጠበቃዬ እንዲቀመጥ አደረኩትና ዳኛውን ከመቀመጫው ብድግ ብድግ እስኪል ጋትኩት። ሁለት ጠበቆች ለሌላ ጉዳይ የመጡ ሊዳኙን፣ ሊገላግሉን ሞከሩ። አንደኛው ጠበቃ ወደ እኔ መጥተው ከፍ ባለ ድምጽ እየተቆጡኝ፣ በለሆሳስ ድምጽ ደግሞ የታባቱንስና አምበሳ ነህ አንጀቴን ነው ያራስከው እያሉ እንባና ሳቄን ቀላቀሉብኝ። ጌትነትን ጠራሁት ቆይ አሁን ባከናንበው ስንት ወር ነው የምቀጣው አልኩት? 6 ወር አለኝ። አመክሮ ሲነሳ ይቀንሳል አለኝ። ኤትአባቱ አልኩና ዳኛውን አስተማርኩት። 6 ወር ፈረደብኝ። 6 ዓመት አይሻልህም አልኩት ማቅለያ አቅርብ አለኝ። አላቀርብም አልኩት። ጠበቆቹ ክቡር ፍርድ ቤት የጥፋት ማቅለያን ጥቅም እንድናስረዳው ይፈቀድልን አሉት። አስረዱት አላቸው። እኔ አውቀዋለሁ አልኳቸው። ቤተሰብ አስተዳዳሪ ነኝ፣ ልጆቼ ሚስቴ እንድል አይደል። አልልም አልኳቸው። 5 ወር ወደ ከርቸሌ አለኝ። አንድ ቀን ጣቢያ አድሬ ወደ ከርቸሌ ነካሁት። በዚያም 3 ወር ታሪክ ሠርቼ ወጣሁ። ቆይቶ ነው እኚያ አባት ለ3 ወር የለህም ብለው የነገሩኝ ትዝ ያለኝ። እኚያ አባት አንድ ዓመት ሙሉ ከቤቴ ተቀምጠው ሄዱ። አንድ ቀን የከርቸሌ ቆይታዬን እተርክላችኋለሁ።

•••

ክፍል 4 ይቀጥላል። ታሪኩ ሙሉ ለሙሉ ጠቅልሎ ወደ ተሃድሶ ካምፕ መግባቱን፣ ዮሴፍ ቤተ ክርስቲያንን እንደ ካምፕ መጠቀማቸውን፣ ከዚያም ጉዞ ወደ እንግሊዝ እንዴት እንደሆነ በአጭሩ ጠቅሼ እዘጋዋለሁ።

•••