የጉራጌ ክልላዊ መንግሥት

ብርሐኑ ዘርጋው

የኢትዮጵያ መንግሥት ፈፅሞ ችላ ሊባሉ የማይገባቸው ህዝባዊ ጥያቄዎች እንደ ማዕበል በራሱ ላይ እያንጃበቡበት ነው:: ለጥያቄዎቹ መልስ ለመስጠት ምናህል ዝግጅትና ፈቃደኝነት እንዳለ ለማወቅ በቅርቡ የጉራጌ ህዝብ ባነሳው የመብት ጥያቄ ዙሪያ የተሰጠው መልስ ምልክት ይሰጠናል:: እምቢተኝነትና ኢህጋዊነት የአብይ መንግስት መለያ ምልክቶች ከሆኑ ቆይቷል:: በተጨማሪም የዶ/ር አብይ አስተዳደር የወደቀና የተሸረሸረ እምነትም የማይጣልበት መንግሥት መሆኑን የምናውቀውየሕዝብን ደህንነትንና ሰላም ማስጠበቅ ባለመቻሉም ነው::

ዶ/ር አብይን እንድንታዘበውና እምነታችንን እንዳንጥልበት ካደረጉን ጉዳዮች አንዱ ምናልባት ምዋነኛው “ላም አለኝ በሰማይ ወተቷን እማላይ” አይነት ወሬዎችን ባለማፈርና ባለመፍራት ያለይሉኝታ ሲያዥጎደጉድና ከተግባሩ ጋር የተጋጨ ሥራ በመሥራቱ ነው::

ዶ/ሩ ኢትዮጵያ ሲሉና እኛ ኢትዮጵያውያን ኢትዮጵያ ስንል አንድ አለመሆኑም ከታወቀ ቆይቷል:: እያንዳንዱም ንግግር ኪሳራን እንጂ ትርፋማ አልሆነልንም:: ኢትዮጵያን በግዙፍ መርከብ ብንመስላት ከክምር በረዶ ጋር የምትላተምበት ወቅት ላይ እንደደረሰች መገመት እንችላለን:: የመርከቧ መሪ አቅም የተፈተነበትና የወደቀበት ሁኔታ ላይ ደርሰናል:: ሕዝብ በሰቆቃ ማእበል እየተናወጠ መሆኑ የሚካድ አይደለም:: ከሰሜን እስከ ደቡብ ከምእራብ እስከ ምሥራቅ ኢትዮጵያ የቀውስ አገር ሆናለች::

በዚህም ምክንያት በአብይ የለውጥ ባቡር ላይ የተሳፈሩት ሁሉ እየወረዱና አቅጣጫ እየለወጡባለበት ጊዜ ዶ/ር አብይን ግን ምንም ያናወጠው አይመስልም:: “ስንኖር ኢትዮጵያዊ ስንሞት ኢትዮጵያ” ብሎ ያቆላመጠባት መሪ ሃሳብ ማማለያና ማታለያ ሁና እንደተቆጠረች ቀርታለች:: ዛሬ ሕዝብ ሲሞት እንጂ ሲኖር ኢትዮጵያዊ መሆኑ በየቀኑ በግልፅ እየተለፈፈ እየተጨረሰ ነው:: ይህም በጣም የሚያሳዝን ነው::

ዲሞክራሲን ሊያለማምደን ለመጣ መምህር ማስፈራራት ማፈን ማሰርና መግደል የሕዝብንም ፍላጎትና ፈቃድ መናድ አይነተኛ የአስተዳደሩ ያሰራር ዘይቤ ሆኗል::

በተለይ በተለይ የአንድ አገር ትልቅ ክፍል የሆነ ሕዝብ ሲጎዳ ሁላችንም እንደተጎዳን መቁጠር በሚገባን አገር ውስጥ አማራው እንደባይተዋር ተቆጥሮ የዘር ፍጅት ሲደርስበት የታላቂቷ ኢትዮጵያ መሪ ግን የሕዝብ ህመም ህመሙ የሕዝብ ስቃይ ስቃዩ አልሆነለትም:: አይኑን ከሰው ነፍስ አንስቶ ችግኝ ላይ ማዋሉ ፈጽሞ ሰብአዊም ይሁን ፍልስፍናዊ እይታው የተንሸዋረረ መሆኑን ያሳያል:: ይህም የሕዝብን አመኔታ ቦርቡሮታል::

ኢትዮጵያችን ዛሬ ከምንጊዜም ይልቅ ልዩነት የጦዘባት: ሰላምና ጸጥታ የጠፋባት መንግስቱም በዚህ ጡዘት ተመቻችቶ ለሽብርና ለዘር ፍጅት ተገቢውን ምላሽ ለመስጠት ተግባራዊ ፍላጎት የማያሳይበት ሆናለች:: ለዚህም ጡዘት ዋነኛ ምክንያት የሆነው ህገ መንግስት አሁንም በአብይና በመንግስቱ ልብ ውስጥ ዙፋኑን ዘርግቶ እስቲ ትሞክሩኝና እያለ ነው:: አብይም እስከ ሞቱ ድረስ የሚዋጋለት ህገመንግስት እንደሆነ ደጋግሞ አስረግጧል:: ይህም ህገ መንግስት ለሕዝብ የተሰጠ ሰነድ ነው:: ከዚህ በመነሳት ከጊዜ ወደ ጊዜ ሕዝቡ ከሰነዱ እየጠቀሰ ተሰጠህ የተባለውን መብቱን ለማስከበር እየተጠቀመበት ነው::

ይህ ሰነድ ለትግሬ ለኦሮሞ ለአማራውና ለሌሎች የብልጽግና ገዢ መደብ የፌዴራል ከክልል እስከቀበሌ ላሉ አካላት የማይናቅ የንብረትና የስልጣን ጥቅም አስገኝቶላቸዋል:: ሕዝብ ግን በየእለቱ ካሉት በታች ከሞቱት በላይ ሆኖ በችግር እየኖረ ነው:: ይህም ፍጹም ድህነት ድምጹ እንዳይሰማና ካደባባይ እንዲርቅ አድርጎታል::

ይልቁንስ የሕዝብን ዲሞክራሲያዊ ጥያቄ  የህገመንግስቱ ሰነድ የፈቀደውን መብት እንኳ ለማፈን ትልቅ ርምጃ ተጉዘዋል:: ይህም የዚህን መንግስት ድክመት ውድቀትና መፍረስ ያመላክታል:: ይህን ለማወቅ የወላይታ ሕዝብን የክልልነት ጥያቄውንና የደረሰበትን አፈና ማየት ይበቃል:: የሚገርመው ሻሸመኔ ስትነድ ያልታደገ የጦር ሃይል ወላይታን ለማንበርከክ ጊዜ ሳይወስድበት ፈጥኖ በመድረስ ጥቃት ፈፅሟል:: ያም ካልበቃ የሰሞኑን የታላቁን የጉራጌን ሕዝብ የክልል ጥያቄ ዋጋ ለማሳጣትእየተሄደበት ያለው የእብደት መንገድን ማጤን ነው:: ክልልነት ሲሰጠውና ሲወሰድበት ለጉራጌ ይህ የመጀመሪያው አይደለም:: ክልልነት መብት ነው:: በችሮታ የሚገኝ አይደለም:: ጉራጌም የጠየቀው መብቱ እንዲከበር ነው:: ህገ መንግስቱም ግልፅ ነው:: ከዛ ይልቅ ግን ብልጽግና  ጉራጌ እንዳይኑ ብሌን የሚያያቸውን ሽማግሌ አባቶቹን የማዋረድ ተግባር ላይ መሰማራቱ የሚያሳዝን ነው:: ይህም የንቀት ጥግ ነው:: ሰላማዊውን ጉራጌ ካልናቀ ማንን ሊንቅ ነው? ይህም ታሪክን አለማወቅ ነው:: ተናቀም አልተናቀ ጉራጌ መብቱን መጠቀሙና መብቱ መከበሩ የማይቀር ነው:: ትግሉንም ይቀጥላል::

ጉራጌ ክልል መሆን አለበት ስንል ምክንያት ለመስጠት በመነሳሳት አይደለም:: ምክንያት የመስጠት ግዴታም የለበትም:: መብቱ ነውና መብት መሆኑ ብቻ በቂ ነው:: ጉራጌ  መብቱን የመጠቀሚያ ጊዜው አሁን ነው:: ክልል ነንና እወቁልን እያለ ነው:: ማንም ግር እንዳይለው ለኦሮሞ ለትግሬና ለአማራ ክልል የሚሉት ቋንቋ ከሰራ ከነሱ በቁጥር ቢሆን እንጂ በምንም ለማያንሰው ለጉራጌም ይሰራል:: ክልል አይሰራም ከተባለ ኦሮሞም ትግሬም አማራም ክልልነትን መተው ይገባቸዋል:: ያደርጉታል ብዬ ግን ራሴን አላታልልም::

ጉራጌ ኢህአዴጋዊ በትር  ያረፈበት የንግድና የኑሮ አቅሙ በሽብርና በሻጥር የተዘረፈና የተቃወሰበት ሕዝብ ነው:: ኢህአዴጋዊ አማራም ይሁን ትግሬ ወይም ኦሮሞ ጉዳቱን ቢያባብስበት እንጂ አልታደገውም:: ብልጽግናም ቢሆን ለጉራጌ ያለው እይታ መብቱን እስከ መንጠቅ የደረሰ ነው:: በተለያ የዘይቤ ሊከፋፍሉት የጀመሩትን ሕዝብ መብቱን አሳጥተው የራሱን እድል በራሱ መንገድ እንዳይወስን ሊያደርጉት እየፈለጉ ካልሆነ በቀር ያልተስማማበትንና ህገ መንግስታዊ ያልሆነን እቅድ ሊጭኑበት አይገባም::

በተለይም ድልድይ ላልሰራህለት ትምህርት ቤት ላልገነባህለት መብራት ላላስገባህለት ምን ጊዜም ግን ቀረጥ የሰበሰብክበት ማሕበረ ሰብ ላይ የሞትና የሕይወትን ውሳኔ ልትወስንበት አትችልም:: ጉራጌ በራሱ አቅምና ሃብት እስከዚህ ደርሷል:: ከታሰረበት የዞን እስር ቤት መፈታት አለበት:: የእስር ሰንሰለቱንም ሰብሮ መውጣት አለበት:: የራሱን ባህልና እሴቶችን የሚያንፀባርቅ የህገ መንግስት የፖለቲካ የጸጥታና ሰላም የትምህርት የጤና የእርሻ የመብራትና ውሃ ሃይል የህግና ዲሞክራሲያዊ አስተዳደር የማህበራዊ ኑሮ ወዘተ ሕዝብ ተኮር አገልግሎትና እንቅስቃሴማድረጉን ይቀጥላል:: ሕዝብ ለሕዝብ እንደቀድሞው ሁሉ አብሮ የሚኖርበትን መፍትሄ በራሱ ይሻል:: ስለዚህ የጉራጌ ሕዝብ ራሱን በትልቁ ለማስተዳደር መብቱን ለመጠቀም ሲሞክር የፖለቲካ ጨዋታ ህጉን በጨዋታው መሃል ላይ ለመለወጥ በክለስተር ተደራጁ ማለቱ ሕዝብን መናቅና እንደሰውም አለመቁጠር የእብደት ጥግ ይመስለኛል:: አይገባችሁም እየተባልን ነው:: እኛ ደግሞ እናንተ ከተገባችሁ እኛም ከማንም አናንስም እያልን ነው:: በዚህ መንገድ ሕዝብን ለማፈን የሚደረገውን ጥረት በጥብቅ እንዋጋዋለን:: እናወግዘዋለንም:: መፋለሚያ ዘዴአችንም ሰላምን የተላበሰ ነው:: የጉራጌ  ሕዝብ ለክልልነት ለዲሞክራሲያዊ አመራር አድልዎ ለሌለበት እድገትና ለሰላም ዝግጁ ነው:: ማደናቀፉን ተዉት!