ከኢንጂነሩ ሞት ጀርባ ምን አይነት ድብቅ አጀንዳ ሊኖር ይችላል? (ያሬድ አማረ)

*  ይሄ ዘንበል ያለው የኢንጅነር ስመኘው አንገት ብቻ አይደለም! የኢትዮጵያ ህዝብም አንገትም ህልውናም ጭምር ነው!

የአባይ ጉዳይ ኢህአዴግ አጣብቂኝ ውስጥ በነበረበት እና የአረብ ስፕሪንግ መቀስቀስ ስጋት በኢትዮጵያም ተመሳሳይ አብዮት ሊቀሰቀስ ይችላል የሚለው ትንበያ  ጭንቀት ውስጥ ከቶት ስለነበር ለግዜው የህዝቡን ልብ ለማማለል የተጠቀመበት የመውጫ አጀንዳው እንደነበር የአደባባይ ሚስጥር ነው፡፡  ከእቅዱ እስከ ፍፃሜው ይወሰዳል ተብሎ የተቀመጠው የግዜ ሰሌዳ አሰልቺና የተንዛዛ መሆን ታክሎበት በቅርቡ ጠቅላይ ሚንስትሩ ስለ አባይ(ህዳሴ ግድብ በችኮላ የተቀይረ ስም መሆኑ ይሰመርበት) የሰጡት ጠቋሚ መረጃ በብዙዎች ዘንድ የመነጋገሪያ አጅንዳ ከመሆን ሳያበቃ የሕዳሴ ግድብ ዋና ሥራ አስኪያጅ ኢንጅነር ስመኘው በቀለ ዛሬ (ሐሙስ ሐምሌ 19 ቀን 2010 ዓ.ም.) ጠዋት አዲስ አበባ አብዮት አደባባይ በመኪናቸዉ ዉስጥ ሞተዉ ተገኙ የሚለው ዜና የበለጠ አስደንጋጭና ከኢንጂነሩ ሞት ጀርባ ምን አይነት ከህዝብ የተደበቀ አጀንዳ ሊኖር ይችላል የሚለው ጥያቄ በእያንዳንዱ ልቦና ውስጥ እንዲጫር በር ከፍቷል ፡፡

    በሌላ በኩል ኢንጂነሩ በዛሬው እለት የጋዜኞች  ቲምን ይዞ ወደ ህዳሴው ግድብ ለመሄድ እቅድ እንደነበረው እየተገለፀ ነው ያለው፡፡ የጋዜጠኛ ቲሙ ጉዞ ምን አልባት የጠቅላይ ሚኒስትሩን አስተያየት ለማጣጣል እና ኢንጂነሩ ሁለት ተርባይኖች በቅርቡ ስራ እንደሚጀምሩ   ተናግረዋል በተባለው መሰረት የተናገሩትን  እውነታና ያለውን ነባራዊ ሁኔታ ለሚዲያ ለማሳየት? የሚለው ሌላው  ምላሽ የሚሻ ጉዳይ ነው፡፡ ምክንያቱም ጠቅላይ ሚኒስትሩ ስለ አባይ ግድብ ጠቋሚ መረጃ ከሰጡ በኋላ በኢንጂነሩ ላይ በስፋት በተለይ በሶሻል ሚዲያው አማካኝነት ይነሱ የነበሩ ዘለፋዎችና ሙያዊ አሉታዊ አስተያየቶች ተጠናክረው በቀጠሉበት ማግስት የግለሰቡን ህልፈት መስማት ከጀርባው ምን አይነት በየትኛው ወገን የተሸረበ፤ከህዝብ የተደበቀ አጀንዳ ሊኖር ይቸላል? የሚለው ጥያቄ ማጫሩ ስለማይቀር፡፡እኔ ግን ፈጣሪ ነፍሱን በአፀደ ገነት ከቅዱሳን ጋር እንዲያኖር እየተማፀንኩ ፡፡

ጠቅላይ ሚኒስትሩ በግድቡ ዙሪያ የሰጡትን ጠቋሚ መረጃ ተከትሎ በኢንጂነሩ ላይ ስድብና ዘለፋ ሲያፋፍሙ የነበሩ ዛሬ በህልፈቱ የቀን ጅቦች በሉት እያሉ አዛኝ መስለው ጣቶቻቸውን ወደሌላ ቀስረው ስመለከት ከማፈርም በላይ ወዴት እየሄድን ነው የሚለው ነገር ከትላንቱ በባሰ ሁኔታ ያሰጨንቀኝ ጀምሯል፡፡