እንቆቅልሽ የሆንሽ ሀገር....!!! (ያሬድ ሀይለማርያም)

+++

ግማሽ ጎንሽ በርሃብ ይጠበሳል፣ በጦርነት ይለበለባል፣ መቶ ሺዎች ተፈናቅለው በየሜዳው ወድቀዋል፣ ሕጻናት በየጥሻው ወድቀዋል፣ ብዙዎች በሕክምና እጦት ይማቅቃሉ፣ የድረሱልን ድምጽ በየቦታው ይናኛል፤

ሹማምንትሽ ምክርቤት ለመግባት ልክ እንደ ትምህርት ቤት ዩኒፎርም አሰፍተው አንድ አይነት ሱፍና ቀሚስ ለብሰውና ተጫምተው የሚሽሞነሞኑብሽ፤

የአዲስ አበባ አዲሱ ምክር ቤት አባላት በማን ወጪ ነው እንዲህ አንድ አይነት ልብስ ለብሰውና ተጫምተው ብቅ ያሉት? ወጪው ከመንግስት? ወይስ ከራሳቸው? አገሪቱ ካለችበት አጣብቂኝ አንጻር መልሱ ምንም ሹማምንት እንዲህ ሲሆኑ ውጤቱ ያው ነው። ከመንግስት ካዝና ከሆነ ይበልጥ ያስተዛዝባል። ገና ያላገለገሉትን ሕዝብ መጣንልህ፤ ሳይሆን መጣንብህ ይመስላል።

መልካም የሥራ ዘመን ልል ነበር ግን አያያዛችሁ አያምርምና በቅድሚያ የምትመሩትን ሕዝብ ምሰሉ ማለትን ወደድኩ።  ሕዝቡን ስትመስሉ ሥራችሁም ይቀናል።