"ቤርቤረሰቦችዬ ሶስቱ እስረኛ ጋዜጠኞች የትና በምን ሁኔታ ላይ ይገኛሉ? ጥቂት ላውጋችሁ...??? (ዘመድኩን በቀለ)

…ይሄ ደግሞ የአሐዱ ሬዲዮ ዜና አርታኢ ነው። በሥራው ላይ ሳለ ስህተት ሠርተሃል ተብሎ ይጠረጠርና ወደዘብጥያ ይወርዳል። በዚያም የሃገሪቱ ሕግ በሚፈቅድለት መልኩ ጠበቃ ቀጥሮ ይከራከራል። ፍርድቤቱም በዋስትና ይፈታና በውጭ ሁኖ ይከራከር ብሎ ይወስናል። በውሳኔውም መሠረት የታሳሪው ወላጅ አባት ፍርድቤቱ ለዋስትና የጠየቀውን 15ሺ ብር ከፍለው፣ የመፈቻ ወረቀቱን ይዘው የአዲስ አበባ ፖሊስ ኮሚሽን ግቢ ቆመው የልጃቸውን መፈታት በጉጉት ይጠባበቃሉ። የልጃቸውን መፈታት መጓጓታታቸውን  ያየው የዐብይ አሕመድ የፖሊስ ተቋም ግን ታሳሪውን ከመፍታት ይልቅ” የምንአባቱንስና ፍርድቤት ውሳኔ ነው” በሚል መንፈስ እስረኛውን በሚኒባስ መኪና ጭኖ ወደ ሌላ ወዳልታወቀ ሥፍራ ይሰውረዋል።

… ቤተሰብ መልሶ የክስ ማመልከቻ ይዞ ፍርድ ቤት ይቀርባል። ተከሳሹ የአዲስ አበባ ፖሊስ ኮሚሽንም ፍርድቤት ይቀርባል። ለተከበረው ፍርድ ቤትም እንዲህ ይላል። “የአሐዱ ኤፍ ኤም ሬዲዮ ዜና አርታኢ የሆነው ክብሮም ወርቁን ከእስር ፈተነዋል። አሁን የት (የትአባቱ እንዳለ ቁጠሩት) እንዳለ አናውቅም። በማለት ለፌደራል ከፍተኛ ፍርድ ቤት ያስታውቃል። የጋዜጠኛው ቤተሰቦች በበኩላቸው ደግሞ ልጃቸው ጋዜጠኛ ክብሮም ከ26 ቀናት በፊት በፍርድ ቤት ከእስር እንዲለቀቀ ቢወሰንለትም እስካሁንም ያለበትን እንደማያውቁ ለፍርድ ቤቱ ይገልጻሉ።

…ጋዜጠኛው “ጭራሹኑ ከእስር አልተፈታም” የሚል እምነት ያላቸው የክብሮም ቤተሰቦች፤ ጉዳዩን ወደ ከፍተኛ ፍርድ ቤት የወሰዱት ባለፈው ህዳር ወር አጋማሽ ነበር። በክብሮም ጠበቃ አቶ ጥጋቡ ደሳለኝ አማካኝነት ለፍርድ ቤቱ የቀረበው አቤቱታ፤ የአዲስ አበባ ፖሊስ ኮሚሽን “የፍርድ ቤት ውሳኔ ባለማክበር፣ ግለሰቡን በኃይል አስገድዶ በመያዝ ከእስር ቤት እንዳይፈታ ከልክሏል” የሚል ነው።

በዚህ መሰረት ጠበቃው “አካልን ነጻ የማውጣት “( habeas corpus) አቤቱታ በመመስረት ጋዜጠኛው ከእስር እንዲፈታ ለፍርድ ቤት አቤት ብለዋል። የአዲስ አበባ ፖሊስ ኮሚሽንም ትናንት ታህሳስ 4፤ 2014 ዓም ለፍርድ ቤቱ በጽሑፍ ባቀረበው መልስ “[ተጠርጣሪው] በኮሚሽኑ በሚገኙ የተጠርጣሪ ማቆያም ሆነ በኮሚሽኑ እውቅና ስር የሌለ” መሆኑን ገልጿል። አከተመ።

…የዳግማዊ ደርግ፣ የዳግማዊ ወያኔ፣ ሥርዓት ሳታስፎግር ከች ያለች ይመስላል። የጋዜጠኞቹ የእስር አያያዝና የፍትህ ሥርዓቱም ወደ ቀደመ ማንነቱ ሳይመለስ እንዳልቀረ ማሳያ ነው ተብሏል። የኢንሳ አለቃ ሆነው ፖለቲከኞችን፣ ጋዜጠኞችን ወደ ዘብጥያ በማውረድ ይታወቁ የነበሩት ዐቢይ አሕመድ አሁን ጭራሽ የሃገሪቱ መሪ አዛዥ ናዛዥ ሆነዋል። እናም ተኩላው የበግ ለምድ ለብሶ መቆየት አልቻለም። ለምዱ ተገፈፈ የሚሉም አሉ። አሁን ይሄ ሁሉ ሆኖ ሳለ ግን የዐብይ አሕመድ መንግሥት የግሉ አድናቂዎች፣ ቅንድቡንና ቁመቱንም፣ ከንፈሩንም የሚያደንቁ በአብዛኛው ሴቶች ናቸው በእሥረኞቹ ላይ ሲያሾፉ እየታዩ ነው። “እሰይ ደግ፣ እንኳንም ታሰሩ” የሚሉ ቀፋፊ ድምጾችንም ሲያሰሙም ይደመጣሉ። ትናንት የመለስ ዜናዊን መንግሥት ጋዜጠኞችን አሰረ ብለው ካልታነቅን ብለው ለገላጋይ ያስቸግሩ የነበሩ “ሃገር ወዳድ ኢትዮጵያውያን” ዛሬ በተራቸው ጋዜጠኞቹ ይፈቱ ማለቱን የዐቢይ ውለታ ሼም አስይዟቸው “ይፈቱ” ባይሉ እንኳ። “እገሌ ይታሰር፣ እገሊት ትቀፍደድ፣ ብለው ራሳቸውን ባያዋርዱ መልካም ነው የሚሉም አሉ። የትኛውም ሥርዓት ይወድቃል። የማይወድቀው ሃገርና ህዝብ ነው። ሥርዓት ይለወጣል። ይሄዳል። ይመጣል። ይተካልም።

…በመጨረሻም ሰሞኑን የገሌው ቤተኛው ኢሳት” ጋዜጠኞች ለዘገባ ኦሮሚያ ክልል ይሄዳሉ አሉ። ለዚያውም እዚሁ ቅርብ ሰበታ ነው አሉ የሄዱት። እዚያ እንደደረሱ የኦሮሚያ ፖሊስ ሰብስቦ እስር ቤት ያጉራቸዋል። ቢባል ቢባል ማን ይስማ። እንዲያውም ፖሊሶቹ በማን ፈቃድ ወደዚህ ክልል መጣችሁ? ብለው ከመጠየቅ አልፈው “እስቲ ዐቢይ መጥቶ ሲያስፈታችሁ እናያለን? ” ወደሚል ኃይለቃል መግባታቸው ተነግሯል። በመጨረሻም ዛር ወጥቶ፣ ተንቀጥቅጦ በስንት አማላጅ ኢሳት ጋዜጠኞቹን ከሰበታ ፖሊስ ጣቢያ ማስፈታቱ ተነግሯል።

… ወዳጄ ይሄ ምልክት ነው። መጪው ጊዜ ከባድ ስለመሆኑ ምልክት ነው። በተለይ ኦሮሚያ ውስጥ ኦነግ እና ኦህዴድ በሥልጣን ሽሚያ ሲሉ ክልሉን ብቻ ሳይሆን ለሃገሪቷም ጠንቅ ሳይሆኑ እንደማይቀሩ የሚሰጉ አሉ። ሙስና፣ ዘረፋ በኦሮሚያ ፖሊስ ሕጋዊ እስኪመስል ድረስ ተስፋፍቷል። አዲስ አበባን ወደ ፊንፊኔነት ለመቀየር ሲባል አንዳን እርምጃዎች መውሰድም ይጀመራል። ከእነዚህ እርምጃዎች መካከከልም አሁን እንደሚደረገው አዲስ አበባ ትያዛለህ። ኦሮሚያ ታስረህ እዚያው ትዳኛለህ። ከዚያ ለቁቤ ማመልከቻ 2ሺ ብር ትከፍላለህ። እንቢ ካልክ ከመረረህ ወይ ወደ ደብረ ብርሃን አልያም ወደ ደብረ ማርቆስ ትሰደዳለህ። ወደ ጉራጌም እንዳትሄድ በዚያም ሽግር አለ።

• ምን ተሻለህ አዲስ አበቤ?