>
5:53 am - Sunday September 25, 2022

ከባልደራስ ለእውነተኛ ዲሞክራሲ ፓርቲ  የተሰጠ አስቸኳይ መግለጫ   

ባልደራስ ለእውነተኛ ዲሞክራሲ ፓርቲ  የተሰጠ አስቸኳይ መግለጫ                                              በአፋርና በአማራ ላይ የሚደረጉ ጭፍጨፋዎችን እናወግዛለን….!!!

 የህዝብን ሕይወት መታደግ ያልቻለ መንግሥት “በቃ” ሊባል ይገባል!!!

የጥላቻ ጎሰኝነትን በኢትዮጵያ ህዝብ ላይ ከተከለው ህወሓት ውድቀት በኋላ፣  የንፁሃን አማሮች ደም  በወለጋ፣ በቤኔሻንጉል ጉሙዝ፣ በምዕራብ ሸዋ፣ በአርሲ፣ በባሌ እና በሀረርጌ ያለማንም ተከላካይ እየፈሰሰ ይገኛል። ይህ  ብሔርና  ሃይማኖት ላይ ያነጣጠረ ጭፍጨፋ አሁንም እንደቀጠለ ነው። ባለፉት ጥቂት ቀናት ብቻ፣  ከ180 በላይ ሰዎች በአንድ ጀምበር  ተጨፍጭፈው  87 የሚደርሱ ንፁሃን ገበሬዎችና ቤተሰቦቻቸው በአንድ ስፍራ ተገድለው  ተገኝተዋል፡፡ ይህ በአማሮች ላይ እየደረሰ ያለውን ጭፍጨፋና ግድያ የፌደራል መንግሥቱ በተደጋጋሚ  እንዲያስቆም  ሲጠየቅ፣ የሽንግላ ምፀት መግለጫዎችን ከመስጠት በዘለለ፣ አሸባሪው ኦነግ/ሸኔንና በመንግሥት ውስጥ ያሉ ተባባሪዎቹን  ተጠያቂ አድርጎ  ግድያውን ለማስቆም የሚያስችል በቂ እርምጃ ሳይወስድ ቀርቷል፡፡
የባልደራስ ለእውነተኛ ዲሞክራሲ አመራር አባላት ሰሞኑን  ከወለጋና ከምዕራብ ሸዋ የተፈናቀሉ ወገኖችን  ደብረብርሃን ከተማ  በመሄድ ባነጋገሩበት ወቅት፣ ተፈናቃዮቹ በቤተሰባቸው፣ በዘመዶቻቸውና፣ በንብረታቸው ላይ የደረሰውን ዘር ተኮር  ጭፍጨፋና ጥቃት እንባቸውን ወደሰማይ እየረጩ አስረድተዋል።  በጥቃቱ የኦሮሚያ መስተዳድር  ባለሥልጣናት እጅ እንዳለበትም አስረግጠው ተናግረዋል፡፡ አክለውም፣  በአሁኑ ሰዓት  ወደ 60ሺ የሚጠጉ  የአማራ ተወላጆች በኦነግ/ ሸኔና ተባባሪዎቻቸው ተከበው የሞት ጥላ ተጋርዶባቸው እንደሚገኙ በመግለፅ፣ የኢትዮጵያ ህዝብና የፌደራል መንግሥቱ ከሞት እንዲታደጋቸው የድረሱላቸው ጥሪ አቅርበዋል።
እንዲሁም፣ በሰሜን ግንባር በኩል ጦረኛው ህወሓት፣ በአፋር ግንባር በኩል ላለፉት ተከታታይ ሳምንታት የማጥቃት ዘመቻ በመክፈት ከወታደራዊ ኢላማዎች ባሻገር በሠላማዊ የአፋር ነዋሪዎች ላይ መጠነ-ሰፊ ጉዳት እያደረሰ ይገኛል፡፡ ይህ ጉዳት፣ በመቶ ሺህዎች የሚቆጠሩ አፋሮች ላይ ለረጅም አመታት የኢኮኖሚ ድቀት የሚያደርስባቸው መሆኑን የዓለም አቀፍ ታዛቢዎች እያስጠነቀቁ ይገኛሉ፡፡ ይህ ሲሆን፣ ህወሓትን የአፋር ክልል ኃይሎች ሲፋለሙ የፌደራሉ መከላከያ ኃይል በሙሉ ኃይሉ እንዲገባ አልተደረገም፡፡ ይህ ሁኔታ ፈጽሞ ተቀባይነት የሌለው ነው፡፡
በመሆኑም፣ ባልደራስ ለእውነተኛ ዲሞክራሲ ፓርቲ፣ በፌደራል መንግሥቱ  ቸልተኝነት ምክንያት፣ በአማራውና በአፋር ላይ እየደረሰ ያለውን ጭፍጨፋ በጽኑ እያወገዘ፣ ለመላው የኢትዮጵያ ህዝብ የሚከተለውን መልዕክት ያስተላልፋል።
ውድ የኢትዮጵያ ህዝብ ሆይ፣ በአሁኑ ሰአት ከንፁሃን ወገኖችህ ከአሰቃቂ እልቂት አውጡን ከሚል የወገን ጥሪ በላይ ሊያሳስብህ  የሚችል ጉዳይ ሊኖር አይችልም።  ወገኖቹ እየታረዱ እንቅልፍ የሚተኛ ህዝብ  የህሊና እዳ ተሸካሚ ነው።  የኢትዮጵያ ህዝብ  ከልክ ያለፈ  ትዕግስትህ ሊበቃ ይገባል፡፡ “አውቆ የተኛን ቢቀሰቅሱት አይሰማም” እንደሚባለው፣ መንግሥትን የሚመሩት ተረኞቹ ኦህዴዶች እና ተባባሪዎቻቸው የንጹሃን አፋሮችን እና አማሮችን እልቂት ለማስቆም ፍላጎት እንደሌላቸው ተገንዝበህ፣  በመንግሥት ላይ በተለያዩ ህጋዊና ሰላማዊ መንገዶች ተቃውሞህን እንድታሰማ እንጠይቃለን። የዜጎቹን በሀገራቸው በህይወት የመኖር መብታቸውን የማያስጠብቅን መንግሥትና  መሪ “በቃ” ሊላቸው ይገባል፡፡
በመጨረሻም፣ መላው የአገራችን ሕዝብም ሆነ የአለም አቀፉ ማህበረሰብ የጉዳት ሰለባ ለሆኑ ኢትዮጵያውያን ሁሉ የእርዳታ  እጃችሁን እንድትዘረጉላቸው አጥብቀን እንማፀናለን፡፡
ባልደራስ ለእውነተኛ ዲሞክራሲ ፓርቲ
ቀን፡- የካቲት 02/06/2014 ዓ.ም
Filed in: Amharic